Athiradi (2026) Sinhala Subtitles | සිංහල උපසිරැසි සමඟ

සැණකෙළියේ ගිණිකෙළිය

විශ්වවිද්‍යාල ජීවිතයේ සුන්දරත්වය, මිත්‍රත්වය සහ අසීමිත හාස්‍යය මුසු කරමින් මෑතකදී තිරගත වුණු සුපිරි මලයාලම් සිනමාපටයක් විදිහට මෙය හඳුන්වන්න පුළුවන්. කතාව ගෙතෙන්නේ එක්තරා ඉංජිනේරු පීඨයක ඉගෙනුම ලබන ශිෂ්‍ය කණ්ඩායමක් වටායි. මීට වසර කිහිපයකට පෙර සිදුවූ මාරාන්තික අනතුරක් හේතුවෙන් මේ විශ්වවිද්‍යාලයේ වාර්ෂිකව පවත්වන ලද සුවිශේෂී සැණකෙළිය බලධාරීන් විසින් සම්පූර්ණයෙන්ම අත්හිටුවීමට පියවර ගන්නවා. නමුත් අලුතින් පැමිණෙන ශිෂ්‍ය කණ්ඩායම මේ නැවතුණු සැණකෙළිය නැවත ආරම්භ කරන්න ලොකු උත්සාහයක් ගන්නවා. විශේෂයෙන්ම මෙහි එන ‘සාම් කුට්ටි’ නැමැති ශිෂ්‍යයා තමන්ගේ මුළු විශ්වවිද්‍යාල කාල සීමාවම වැය කරන්නේ මේ සැණකෙළිය පවත්වන්න පාලක මණ්ඩලයෙන් අවසරය ලබාගැනීමටයි. අවසානයේදී ඔවුන්ට ඒ සඳහා අවසරය ලැබෙන විට ඔවුන් සිටින්නේ තමන්ගේ අවසන් වසරේයි. ඉන්පසුව ඔවුන් ඉතාමත් උත්කර්ෂවත් අන්දමින් සංවිධානය කරන මේ සැණකෙළිය සාර්ථක කරගන්න මොන වගේ සෙල්ලම් දාන්න වෙනවාද කියන එක තමයි මෙයින් හාස්‍යජනක ලෙස දිගහැරෙන්නේ.

මෑත කාලයේ දිගින් දිගටම වාර්තාපිට වාර්තා තබන මලයාලම් සිනමාවේ තවත් එක් සාර්ථක වාණිජමය ජයග්‍රහණයක් විදිහට මේ චිත්‍රපටය හඳුන්වන්න පුළුවන්. ඉන්දීය රුපියල් කෝටි 30ක පමණ බජට් එකකින් නිර්මාණය වෙලා, බොක්ස් ඔෆිස් හි කෝටි 71කට අධික දැවැන්ත ආදායමක් උපයා ගැනීමට මේ චිත්‍රපටය සමත් වුණා. ප්‍රසිද්ධ නළු මෙන්ම අධ්‍යක්ෂක බැසිල් ජෝශප් (Basil Joseph) විසින් නිෂ්පාදනය කරමින් සාම් කුට්ටි ලෙස ප්‍රධාන චරිතයට පණ පොවන නිසාම මෙහි හාස්‍යය ගැන අමුතුවෙන් කිවයුතු නැහැ. ඔහුට අමතරව ජනප්‍රිය නළු ටොවිනෝ තෝමස් (Tovino Thomas), සරීන් ශිහාබ් (Zarine Shihab), විනීත් ශ්‍රීණිවාසන් (Vineeth Sreenivasan) සහ මෑතකදී රසික ආදරය දිනාගත් රියා ශිබූ ඇතුළු දක්ෂ නළු නිළියන් රැසක් මෙහි රංගනයෙන් දායක වෙනවා.

අරුන් අනිරුධන් (Arun Anirudhan) ගේ අපූරු අධ්‍යක්ෂණයක් වෙන මේ චිත්‍රපටය ආරම්භයේදී තරමක් මන්දගාමී ස්වභාවයක් ගත්තත්, කතාව ඉදිරියට යත්ම අතිශය උණුසුම් මෙන්ම විනෝදයෙන් පිරුණු අපූරු සිනමා අත්දැකීමක් බවට පත්වෙනවා. අවසානයේදී ඉතාමත් සාර්ථක සහ ලස්සන ක්ලයිමැක්ස් (Climax) එකක් සමඟින් නිමාවන මේ නිර්මාණය, සති අන්තයේ පවුලේ හැමෝටමත් එක්ක කිසිම කම්මැලිකමකින් තොරව, බඩ පැලෙන්න හිනාවෙවී රසවිඳින්න පුළුවන් නියම මලයාලම් කොමඩි ෆිල්ම් එකක් විදිහට නිර්දේශ කරන්න පුළුවන්.

• Subtitle By: සමිත් ඩිල්ෂාන් [cineru]