DRAGN (2025) Sinhala Subtitles | සිංහල උපසිරැසි සමඟ

මාරක යන්ත්‍රය

කෘතීම බුද්ධිය (AI) සහ අතිනවීන තාක්ෂණය මිනිසාගේ පාලනයෙන් ගිලිහී ගියොත් සිදුවිය හැකි බිහිසුණු විපාක ගැන වෙනස්ම ආකාරයකට දිගහැරෙන අපූරු සයන්ස්-ෆික්ෂන් සර්වයිවල් (Survival Thriller) චිත්‍රපටයක් විදිහට මේ නිර්මාණය හඳුන්වන්න පුළුවන්. කතාව ආරම්භ වෙන්නේ කාර්යාලයක සේවය කරන පිරිසක් තමන්ගේ දෛනික වැඩවලින් ඇතිවුණු පීඩනය නිදහස් කරගැනීම සහ එකිනෙකා අතර බැඳීම වර්ධනය කරගැනීමේ කඳවුරක් (Team-building retreat) සඳහා ඝන කැලෑවක් මැදට යෑමත් සමඟයි. නමුත් ඔවුන් කිසිසේත්ම බලාපොරොත්තු නොවුණු විදිහට, වර්තමාන යුධ කටයුතු සඳහා අත්හදා බලන ස්වයංක්‍රීය ඩ්‍රෝන තාක්ෂණයෙන් සහ කෘතීම බුද්ධියකින් ක්‍රියාත්මක වන අති නවීන ඩ්‍රෝන යානයක් හදිසියේම පාලනයෙන් මිදී මේ කණ්ඩායම සිටින ප්‍රදේශයට කඩා වදිනවා.

කිසිදු හැඟීමක් දැනීමක් නැති, මහන්සියක් නොදැනෙන මේ මාරක යන්ත්‍රය, තමන්ගේ ඉලක්කයන් විදිහට මේ අහිංසක පිරිසව දඩයම් කරන්න පටන් ගන්නේ මුළු කැලෑවම ලේ විලක් බවට පත් කරමින්. බාහිර ලෝකයත් එක්ක තියෙන සන්නිවේදන සබඳතා සියල්ලම බිඳ වැටෙන අතර, කිසිදු ආයුධයක් නොමැතිව තනිවන මේ පිරිසට තමන්ගේ ජීවිත බේරාගැනීම වෙනුවෙන් දැවැන්ත සටනක් දෙන්න සිද්ධ වෙනවා. ගස් වැල් අස්සේ හැංගෙමින්, තමන්ගේ මිතුරන් එකිනෙකා මේ අදෘශ්‍යමාන දඩයක්කාරයාට බිලිවෙද්දී, ඉතිරිවන පිරිස තමන්ගේ මොළය පාවිච්චි කරලා මේ මාරක ඩ්‍රෝන් යානයෙන් බේරෙන්න කරන උත්සාහය නිසා මුල ඉඳන්ම කතාව ඇතුළේ දැඩි කුතුහලයක් සහ බියක් නිර්මාණය වෙනවා.

පීටර් වෙබර් (Peter Webber) විසින් අධ්‍යක්ෂණය කරන ලද මේ චිත්‍රපටයේ ජේම්ස් පැක්ස්ටන්, ලිලී කෘග් සහ ප්‍රවීණ රංගන ශිල්පී කාලෝස් බාර්ඩෙම් ඇතුළු පිරිසක් ප්‍රධාන චරිත සඳහා තමන්ගේ දායකත්වය ලබාදෙනවා. විශේෂයෙන්ම මේ ඩ්‍රෝන යානය මිනිසුන් පසුපස හඹා එන දර්ශනවලදී පසුබිමෙන් ඇසෙන සංගීත රටාවන් ප්‍රේක්ෂකයාගේ ඇඟ කිලිපොළා යන හැඟීමක් ඇති කිරීමට සමත්. තාක්ෂණයේ තියෙන අඳුරු පැතිකඩ සහ මිනිසා සහ යන්ත්‍රය අතර සිදුවන මේ බිහිසුණු ගැටුම, අවසානය දක්වාම දැඩි ත්‍රාසජනක අත්දැකීමක් විදිහට දැකගන්න ලැබෙනවා.

• Subtitle By: [cinemx]